Pas deklaratës së kryeministrit se Maqedonia nuk është larg marrëveshjes me Bullgarinë dhe të liderit të BDI-së, se Shkupi e Sofja kanë shkëmbyer dokumente, Qeveria nuk jep detaje të reja.

Ashtu si deri tani, shprehet optimiste se do të arrihet zgjidhje, që nuk do ta cenojë identitetin maqedonas.

“Kontaktet dhe shkëmbimet e ideve mes Qeverisë sonë dhe asaj bullgare janë në rrjedhë, sepse të dyja palët po angazhohemi në gjetjen e zgjidhjes. Si për Maqedoninë e Veriut ashtu dhe për Bullgarinë është veçanërisht e rëndësishme të vazhdojë integrimi evropian i rajonit. Andaj me optimizëm i shohim zgjidhjet e mundshme, të cilat do të sigurojnë të ardhmen tonë evropiane, përmes respektimit të plotë të identitetit maqedonas” -thonë nga Qeveria.

Ministri i Jashtëm, Osmani nuk u përgjigj për Alsat nëse vërtetë janë shkëmbyer dokumente dhe për çfarë bëhet fjalë, nëse Shkupi i është përgjigjur ofertës bullgare që u parashtrua në Samitin e Sofjes, apo nëse bëhet fjalë për një ofertë të re nga pala e Maqedonisë së Veriut. Për këtë situatë ka reaguar opozita maqedonase, e cila i kërkon Qeverisë të tregojë se çfarë kompromisi është në gjendje të bëjë. VMRO DPMNE-ja kërkon që pushteti ta informojë rreth bisedimeve qoftë edhe në një seancë të mbyllur në Komisionin Parlamentar të Politikës së Jashtme.

“Duke i ditur linjat e kuqe të Qeverisë bullgare, pyesim dhe Zaev menjëherë duhet të përgjigjet: Çfarë përmban kjo ofertë që Qeveria e Zaevit ia dha palës bullgare? Nga çka heq dorë Zaev dhe çfarë dëmi do të durojnë qytetarët dhe shteti shkaku i ofertës së tij për marrëveshje të re dhe zhbllokim të integrimeve evropiane? A ua ka premtuar këtë marrëveshje qytetarëve para zgjedhjeve, a jua ka sqaruar atyre? – deklaroi Dimçe Arsovski, VMRO DPMNE.

Së fundmi, ambasadorja amerikane, Bërns theksoi rëndësinë e fillimit të negociatave mes Shkupit e BE-së deri në fund të këtij viti, duke kërkuar që çështjet dyplaëshe të zgjidhen jashtë procesit të BE-së. Sofja zyrtare është shprehur e gatshme për dialog me Shkupin, megjithatë është treguar e palëkundur nga kërkesat për respektimin e formulimit të gjuhës në përputhje me Marrëveshjen 2017-tës, me udhërrëfyes preciz për zbatimin e marrëveshjes dhe heqje dorë nga pretendimet për pakicë maqedonase në Bullgari./alsat